Sú ákvörðun fjármála- og efnahagsráðherra að auglýsa starf seðlabankastjóra laust til umsóknar er ekki vantraustsyfirlýsing á hendur Má. Þetta segir Már sjálfur í bréfi sem hann sendi samstarfsfólki sínu í Seðlabankanum í dag, en hann segir að Bjarni Benediktsson, fjármála- og efnahagsráðherra, hafi tjáð sér að það muni koma fram opinberlega. Í tilkynningu frá ráðuneytinu í morgun kom slíkt aftur á móti ekki fram.

Þá segir Már að á næstu vikum muni skýrast betur hvernig staðið verði að framhaldi málsins en að ekki standi til að ganga gegn sjálfstæði bankans né faglegri yfirstjórn. Már ítrekar í bréfinu að hann hafi lýst því yfir að hann sé tilbúinn að hefja nýtt tímabil sem seðlabankastjóri og að sú yfirlýsing standi áfram.

Hann setur aftur á móti þann varnagla við fyrri yfirlýsingu að ef gerðar verði lagabreytingar sem feli í sér að eðli starfsins breytist eða breytingar verði á umsóknarferlinu sjálfu muni hann leggja nýtt mat á málið. „Það verður því að bíða og sjá og ekki má gefa sér fyrirfram hvort slíkar breytingar eru til hins verra eða betra enda eru góð orð um að sérfræðiþekking Seðlabankans verði nýtt í því ferli sem framundan er,“ segir Már að endingu í bréfinu.

Tengdar fréttir

Seðlabankinn

Vextir lækki í fyrsta lagi um mitt árið

• Mælir gegn frekari stýrivaxtahækkun
• Ásgeir Jónsson: Var ekki að vísa í tveggja manna tal
• Ríkissáttasemjari hringdi ítrekað í seðlabankastjóra
• Umdeilanlegt að höfða mál gegn starfsmönnum

» Fleiri tengdar fréttir

• Blogga um frétt