Brotalamir á söluferlinu á Klakka

Tilboðsferli við sölu Lindarhvols á 17,7% eignarhlut í Klakki var ógagnsætt. Heimildir ViðskiptaMoggans herma að samkvæmt skilmálum sem lágu fyrir er hluturinn var seldur hafi bjóðendum borið að senda boð sín á tiltekið netfang. Fyrirmælin báru ekki með sér að gerðar væru ráðstafanir til þess að tilboðin væru óopnuð þar til tilboðsfrestur væri út runninn.

Niðurstaða Lindarhvols var að selja Burlington Loan Management hlutinn, en sá aðili á nú samtals 75% í Klakka. Ein helsta eign Klakka er fjármálafyrirtækið Lýsing.

Athygli vekur að lén Lindarhvols, lindarholleignir.is, þangað sem senda átti tilboðin er skráð á lögfræðistofu Steinars Þórs Guðgeirssonar sem var stjórnarmaður í Klakka þegar hluturinn var seldur. 

Ekki hafa fengist svör frá Steinari Þór þrátt fyrir eftirgangsmuni, að því er fram kemur í umfjöllun um mál þetta í ViðskiptaMogganum í dag.