Austurríska flugfélagið Austrian Airlines tilkynnti í dag að það hygðist hefja flug að nýju 15. júní, eftir að hafa haldið kyrru fyrir á jörðu niðri í nærri þrjá mánuði sökum faraldurs kórónuveirunnar.
Í fyrstu vikunni verður boðið upp á flug til Amsterdam, Aþenu, Basel, Berlínar, Brussel, Búkarest, Dubrovnik, Düsseldorf, Frankfurt, Genfar, Hamborgar, Kaupmannahafnar, Larnöku, Lundúna, München, Parísar, Pristínu, Sarajevo, Skopje, Sofíu, Stokkhólms, Stuttgart, Tel Aviv, Þessalóniku, Tírönu, Varna og Zürich.
Í vikunni þar á eftir, eða frá 22. júní til 28. júní, bætast við eftirfarandi áfangastaðir: Belgrad, Graz, Innsbruck, Kænugarður, Košice, Mílanó, Nice, Prag, Split og Varsjá.
Að sögn flugfélagsins verður að mestu flogið á smærri vélum á borð við Embraer 195 og Dash 8. Sætaframboðið verður þá aðeins um 5% af því sem boðið var upp á á sama tíma í fyrra.
Farþegar munu þurfa að bera grímur til að hylja vit þeirra, segir í tilkynningu frá flugfélaginu, sem stendur í samningaviðræðum við stjórnvöld í Vín um ríkisaðstoð.
Í fyrstu krafðist félagið 767 milljóna evra en austurrískir fjölmiðlar herma að fjárhæðin hafi lækkað eftir að starfsmenn flugfélagsins tóku á sig launalækkanir.