Lögmaður Samherja sagði í aðalmeðferð í Héraðsdómi Reykjavíkur að mál Seðlabanka Íslands gegn fyrirtækinu hafi valdið því bæði fjárhagstjóni og miska. Allur málareksturinn sem Samherji þurfti að standa í í framhaldinu hafi verið á ábyrgð Seðlabankans og vegna saknæmrar og ólögmætrar framgöngu bankans. Málareksturinn hafi verið „fullkomlega tilefnislaus“ allt frá upphafi.
Lögmaðurinn Garðar Guðmundur Gíslason sagði húsleit og haldlagningaraðgerð í fyrirtækjum Samherja 27. mars 2012 hafi verið þá stærstu sem farið hefur fram hér á landi. Hann gagnrýndi að fyrsta frétt RÚV um aðgerðirnar hafi birst 21 mínútu eftir að þær hófust og að Seðlabankinn hafi sent út um allan heim fréttir í gegnum RSS-veitu til 601 viðtakanda um að hann hefði farið í aðgerðirnar.
Hann sagði allt benda til þess að starfsmenn RÚV hafi verið upplýstir um aðgerðirnar fyrirfram. Þeir hafi verið mættir á staðinn á undan starfsmönnum Samherja og að teknar hafi verið myndir af starfsmönnunum á leið inn í fyrirtækið. Einnig sagði hann fréttaskýringaþáttinn Kastljós hafa verið sýndan um kvöldið. Hann hafi ekki verið unninn á einum degi.
Hann sagði ásakanirnar í garð Samherja „gríðarlega alvarlegar“. Fyrst er krafist skaðabóta að fjárhæð 289 milljónir króna og í öðru lagi eru skaðabótakröfur upp á 58 milljónir króna. Miskabætur hljóða upp á 10 milljónir króna.
Garðar sagði Seðlabankann hafa valdið stefnanda margföldu tjóni. Komið hafi í ljós að aðgerðirnar hafi verið tilgangslausar. Eftir þær hafi smátt og smátt komið í ljós „skýrar vísbendingar um að háttsemi stefnda hafi verið ólögmæt og viðhöfð af ásetningi“. Hann bætti við að menn hafi vitað að þeir máttu ekki ráðast í aðgerðirnar og að minnsta kosti hafi verið um stórkostlegt gáleysi að ræða.
Lögmaðurinn vísaði í bókina Gjaldeyriseftirlitið – Vald án eftirlits? eftir Björn Jón Bragason frá árinu 2016. Af bókinni megi ráða að enginn rökstuddur grunur hafi verið fyrir hendi.
Einnig nefndi hann að Már Guðmundsson, fyrrverandi seðlabankastjóri, hafi í þrígang á síðasta ári sagt að stjórnvöld hefðu ekki haft rökstuddan grun um refsivert brot þegar ráðist var í húsleitirnar. Átti hann við bréf til forsætisráðherra, viðtal við Morgunblaðið og skýrslu sem hann gaf fyrir stjórnskipunar- og eftirlitsnefnd Alþingis. Sagði Garðar þetta bera merki um að stjórnvaldið hafi verið í veiðiferð.