Yngvi Harðarson, hagfræðingur og framkvæmdastjóri Analytica, segir nokkra þætti leggjast á eitt um að styrkja gengi krónu en evran er nú á svipuðu róli og fyrir faraldurinn.
Áhrifaþættir að undanförnu geti verið að framleiðendur loðnuafurða séu að selja gjaldeyri vegna væntinga um mikinn loðnuafla. Þá sé ferðaþjónustan að rétta úr kútnum en líklegt sé að fyrirtæki í greininni leitist við að verjast hækkun krónu með framvirkri sölu á gjaldeyri.
Þetta kemur fram í Morgunblaðinu í dag.
Jafnframt sé verðbólguþrýstingur orðinn augljósari en það styrki peningalegt aðhald Seðlabankans, til dæmis í formi vaxtahækkana.
„Líklegt er að vaxtamunur aukist við útlönd en það hefur tilhneigingu til að laða að fjármagn, vegna ákvarðana bæði innlendra og erlendra aðila. Þetta gerist bæði í formi spákaupmennsku og vegna gjaldeyrisvarna útflytjenda,“ sagði Yngvi. Einnig virðist innlendir fjárfestar nú fjárfesta minna erlendis.
Gjaldeyrismiðlari sagði það eiga þátt í styrkingu krónunnar undanfarið að reglur á gjaldeyrismarkaði hefðu verið rýmkaðar í fyrrasumar og spákaupmenn hafið innreið sína á markaðinn.
Peningastefnunefnd Seðlabanka Íslands mun sitja á rökstólum á mánudag og þriðjudag í næstu viku og kynna á miðvikudag fyrstu vaxtaákvörðun þessa árs.