Stór og væn loðna veiðist fyrir austan

„Gærdagurinn var góður enda var ágætis veiði í góðu veðri. Í dag höfum við aðallega verið í blindbyl og brælu og veiðin hefur ekki verið neitt sérstök. Það er einhver vindstrengur hér á slóðinni sem hefur fylgt okkur. Ég var að tala við einn skipstjóra sem er með skip að veiðum nokkuð norðan við okkur og hjá honum er búin að vera blíða í allan dag.“

Þetta sagði Albert Sveinsson, skipstjóri á Víkingi AK, en rætt var við hann um miðjan dag í gær og var þá stefnt að því að skipið kæmi til hafnar á Vopnafirði um miðnætti. Haft er eftir Alberti á vef HB Granda að að þetta hafi verið önnur veiðiferðin á loðnumiðin austur af Langanesi á þessu ári.

Loðnan virðist þá vera stór og ætti að henta til frystingar til manneldis, að því gefnu að engin áta sé í henni.

„Við höfum séð stikkprufur hér um borð sem sýna allt niður í 31 stykki í kílóinu en við höfum líka séð 37 stykki og 45 stykki í kílóinu. Mér skilst að það hafi eitthvað verið fryst af afla Venusar NS sem kom aftur á miðin í gær og til standi að reyna frystingu á hluta þess afla sem við erum með. Það fer þó allt eftir því hvort áta er í loðnunni eða ekki,“ sagði Albert en er rætt var við hann var Víkingur kominn með tæplega 1.100 tonna afla. Þar af skilaði mánudagurinn tæpum 700 tonnum.

• Blogga um frétt