70 tonn af graðýsu og stórþorski

Mokveiði var hjá ísfisktogaranum Gullver NS á Síðugrunni þar sem fengust 70 tonn á tuttugu klukkustundum. Togarinn kom til löndunar á Seyðisfirði í gærmorgun og var aflinn 107 tonn.

„Við vorum búnir að landa tvisvar sinnum í Hafnarfirði fyrir þennan túr. Að lokinni seinni lönduninni héldum við út á Eldeyjarbanka en þar reyndist vera hálfdauft. Eftir tvo sólarhringa yfirgáfum við Eldeyjarbankann og sigldum austureftir,“ segir Þórhallur Jónsson skipstjóri um veiðiferðina í færslu á vef Síldarvinnslunnar.

„Þegar komið var á Síðugrunn reyndum við fyrir okkur og þar var mokveiði. Á Síðugrunni fengust 70 tonn á 20 tímum og þarna var um að ræða graðýsu og stórþorsk. Að loknum þessum 20 tímum var komið hrygningarstopp á svæðinu og þá var keyrt austur á Fótinn. Á Fætinum tókum við 15 tonn og þar með var skipið nánast fullt og haldið til löndunar,“ segir hann.

Gullver mun halda til veiða á ný á laugardagskvöld.

• Blogga um frétt