Fiskafli í mars minni en á síðasta ári

Fiskafli íslenskra skipa í marsmánuði var 157.277 tonn sem er 22% minna en í mars á síðasta ári. Þetta kemur fram í nýjum tölum frá Hagstofu Íslands.

Botnfiskafli var þannig rúm 53 þúsund tonn sem er samdráttur um 6% frá fyrra ári. Þar af nam þorskaflinn rúmum 31.500 tonnum sem er 8% minni afli en fyrir ári. Rúmlega 6 þúsund tonn veiddust af ufsa og ríflega 4 þúsund tonn af ýsu.

Fiskafli uppsjávartegunda nam tæplega 101 þúsund tonnum sem er 29% minni afli en á sama tímabili í fyrra. Loðna var uppistaðan í uppsjávaraflanum en veiði á henni nam tæplega 82 þúsund tonnum samanborið við tæp 132 þúsund tonn fyrir ári.

Heildarafli á 12 mánaða tímabili frá apríl 2017 til mars 2018 var 1.232 þúsund tonn sem er 15% aukning miðað við sama tímabil ári fyrr.

• Blogga um frétt