Smáforrit fyrir tilkynningaskyldu

Neyðarlínan og Landhelgisgæslan hafa tekið í notkun nýtt smáforrit sem skip og bátar geta notað til að tilkynna til Vaktstöðvar siglinga þegar þau leggja úr höfn. 

Fram kemur á heimasíðu Landhelgisgæslunnar, að smáforritið sé fyrst og fremst ætlað minni skipum en ekkert sé því til fyrirstöðu að stærri skip noti það einnig. Hægt sé að nálgast forritið, sem heitir „Vss App”, í Play store fyrir Android snjallsíma. Sama forrit beri nafnið „VSS Login“ og sé aðgengilegt í App Store fyrir þá sem hafa Apple snjallsíma.

Þegar forritinu hefur verið hlaðið niður, getur skipstjóri skráð sig inn með kennitölu og í framhaldi notað forritið til að skrá skip sitt úr höfn. Þá geta skipstjórar farþegaskipa skráð fjölda farþega og áhafnarmeðlima um borð. Hugbúnaðurinn virkar þannig að ef ferilvöktunarbúnaður viðkomandi skips er óvirkur þegar það er tilkynnt úr höfn með þessum hætti, fær skipstjóri ábendingu frá forritinu um að hafa samband við Vaktstöð siglinga.

Landhelgisgæslan segir, að öll íslensk skip séu í ferilvöktun hjá Vaktstöð siglinga svo hægt sé að bregðast við ef alvarlegir atburðir koma upp um borð. Ef ferilvöktun skips verði óvirk og ekki næst samband við skipið sendir stjórnstöð Landhelgisgæslunnar björgunaraðila til aðstoðar. Skip í grenndinni eru gjarnan fyrst á vettvang.  Mörgum mannslífum hafi verið bjargað fyrir tilstuðlan ferilvöktunarinnar og samstarfsins við íslenska sjómenn. 

Árið 2017 er annað árið frá upphafi mælinga sem enginn íslenskur sjómaður lætur lífið úti á sjó og segir á heimasíðu Landhelgisgæslunnar, að ferilvöktunarkerfið eigi stóran þátt í þeim góða árangri.​

• Blogga um frétt