„Snýst ekkert um heppni“

„Sumir vilja meina að við höfum verið heppnir en þetta snýst ekkert um heppni heldur lagni og þolinmæði,“ segir Gísli Runólfsson, skipstjóri á Bjarna Ólafssyni AK. Góð kolmunnaveiði var í íslenskri lögsögu í júlí síðastliðnum, og samkvæmt upplýsingum á vef Síldarvinnslunnar bárust henni alls 17.400 tonn til vinnslu.

Segir Gísli að veiðin hafi gengið framar vonum og áhöfn skipsins fyllt lestina í aðeins fimm til sex holum.

Bjarni Ólafsson AK kom með fullfermi til Neskaupstaðar alls fjórum sinnum í júlímánuði og aflaði þannig tæpum 6.400 tonnum. Þá landaði Börkur NK 5.400 tonnum, Beitir NK 3.300 tonnum og önnur skip útgerðarinnar 2.300 tonnum.

Skip Síldarvinnslunnar hafa nú gert hlé á kolmunnaveiðum og snúið sér til makrílveiða.

• Blogga um frétt