„Síldin er góð og rosalega falleg“

„Við fengum 980 tonn í þremur holum. Hvert hol tók um þrjá og hálfan tíma og við vorum um  17 klukkutíma að veiðum,“ segir Runólfur Runólfsson, skipstjóri á Bjarna Ólafssyni AK, sem kom með 980 tonn af norsk-íslenskri síld til Neskaupstaðar í morgun.

Segir hann veiðiferðina hafa gengið afar vel.

„Veiðiferðin var því vel lukkuð og síldin er góð og rosalega falleg. Við vorum að veiðum í Smugunni alveg austur við norsku línuna. Veiðisvæðið var um það bil 380 mílur austur af Dalatanga.“

Beitir NK kemur á miðin í dag en Börkur NK er enn í höfn eftir að hafa landað góðum afla fyrir helgina, að því er fram kemur á vef Síldarvinnslunnar. Segir þar að ljóst sé að brátt muni veiði á norsk-íslensku síldinni ljúka hjá skipum útgerðarinnar, en síðan muni þau væntanlega snúa sér að veiðum á íslenskri sumargotssíld.

• Blogga um frétt