NYT fjallar um loftslagsbreytingar og íslenskan sjávarútveg

Bandaríska dagblaðið New York Times birtir í dag á vef sínum ítarlega umfjöllun um áhrif hitastigsbreytinga í hafi á íslenska fiskstofna. Í greininni er bæði rætt um hvernig hlýnun sjávar umhverfis landið hefur átt þátt í tilfærslu stofna inn og út úr íslenskri lögsögu, en einnig hvernig hreyfingar fiskstofna hafa valdið deilum á milli þjóða.

Blaðamaður NYT ræðir m.a. við íslenska sjómenn og fræðimenn um þróunina og hvernig breyttar aðstæður í sjó kunna að skýra loðnubrest, auk þess að hafa áhrif á stofna eins og þorskinn sem m.a. nærist á loðnu. Bendir blaðamaður á að eftir því sem sjór hlýnar leiti fiskurinn í hafinu í kaldari sjó nær pólunum, og ef vissar tegundir hverfa frá íslenskum fiskveiðimiðum komi aðrar í staðinn. Á þeim svæðum jarðar þar sem hafið er heitast megi vænta þess að staðan verði töluvert verri, enda engar tegundir sem koma í stað þeirra sem flýja hitann. Þannig kunni dýrmæt uppspretta dýrapróteins að vera í hættu hjá fólki í strandhéruðum margra fátækustu ríkja heims, við miðbaug.

Grein New York Times kemur inn á fiskveiðideilur Íslands, Noregs, Bretlands og Evrópusambandsins og hefur blaðið eftir fræðimanni við Rutgers-háskóla að deilur um fiskveiðar hafi átt þátt í að Ísland ákvað að gerast ekki aðili að Evrópusambandinu. Vitnar greinin einnig í prófessor við Iowa-háskóla, sem komst að því að frá seinni heimsstyrjöld megi rekja um fjórðung hernaðardeilna milli lýðræðisríkja til átaka um fiskveiðar. Ályktar blaðamaður að þess háttar deilur geti orðið tíðari ef loftslagsbreytingar valda því að dýrmætar fisktegundir færast frá lögsögu einnar þjóðar til annarrar. ai@mbl.is

• Blogga um frétt