„Það er enginn friður til að athafna sig“

Áhafnir uppsjávarskipa sem hafa verið við kolmunnaveiðar í færeyskri lögsögu hafa fengið að kynnast erfiðum veðurskilyrðum að undanförnu, að því er fram kemur á vef Brims. Þar er haft eftir Berg Einarsson, skipstjóra Venusar NS, á tíu dögum hefur tvisvar þurft að leita vars í færeyskum höfnum.

„Við fórum að heiman að kvöldi 3. janúar og það má segja að allan tímann hafi verið ótíð. Veður eru mjög hörð hérna og það er enginn friður til að athafna sig. Við reynum að nýta þá glugga sem gefast og einum slíkum veðurglugga er spáð seinni part laugardags. Hann á að vera 18 tímar og gangi spáin eftir ætti að vera friður til veiða fram á sunnudagsmorgun. Reyndar hefur svona gluggum verið spáð áður en okkur reynsla er sú að umræddir gluggar eru líkari lausafögum,“ segir Bergur er Venus var í vari við Suðurey vegna veðurs.

Á þessum túr hefur tekist að veiða um 840 tonn af kolmunna, en aðeins hafa verið tekin þrjú hol vegna veðurs, að sögn skipstjórans.

„Þegar við höfum getað verið að þá höldum við okkur á gráa svæðinu syðst og austast í færeysku lögsögunni. Kolmunninn er enn að ganga suður til hrygningar en venjulega deyr veiðin hérna út í kringum 20. janúar. Svo gerist ekkert fyrr en eftir svona viku af febrúar. Þá byrjar kolmunninn að ganga norður eftir í ætisleit. Veiðin er fyrst vestur Írlandi og svo færist hún smám saman norðar,“ segir hann.

• Blogga um frétt