Sóttu veikan sjómann við erfiðar aðstæður

Landhelgisgæslunni barst tilkynning frá björgunarstöð í Danmörku um veikan sjómann um borð í grænlenskum togara upp úr klukkan níu í morgun. Var áhöfnin á TF-GRO send af stað til að sækja sjómanninn en skipið var rúmlega 150 sjómílur vestur af Látrabjargi, rétt utan miðlínu milli Ísland og Grænlands, að því er segir í fréttatilkynningu Landhelgisgæslunnar.

Togaranum var snúið í átt að Íslandi en slæmt veður var á svæðinu. „TF-GRO tók á loft frá Reykjavíkurflugvelli laust eftir klukkan 10 en jafnframt var áhöfnin á TF-EIR til taks á Reykjavíkurflugvelli ef á þyrfti að halda.  Eftir rúmlega hálftíma flug lenti þyrlan á Rifi til að fylla á eldsneytistankana áður en haldið var í átt að skipinu,“ segir í tilkynningunni.

Þá var þyrlan komin að skipinu upp úr ellefu. „Sigmaður Landhelgisgæslunnar fór um borð í skipið og undirbjó sjúklinginn til flutnings. Þrátt fyrir nokkuð krefjandi aðstæður gengu hífingar vel og að  þeim loknum var haldið rakleiðis á Reykjavíkurflugvöll. Þar lenti TF-GRO klukkan 13:42 og í kjölfarið var skipverjinn fluttur þaðan með sjúkrabíl á Landspítalann.“

Ljósmynd/Landhelgisgæslan

• Blogga um frétt