Útgerðarfyrirtæki notuð í umfangsmiklu svindli

Fleiri en 40 kærur hafa ratað inn á borð norsku lögreglunnar frá erlendum fyrirtækjum sem telja sig kaupa vörur frá norskum eldis- og sjávarútvegsfyrirtækjum, en viðskiptin reynast vera hluti af stærri svikamyllu, að því er fram kemur í umfjöllun iLaks.

Lögreglan kveðst hafa handtekið fleiri aðila sem hafa sinnt peningaþvætti í tengslum við málið víðs vegar um Noreg. Þá er talið að umfang þessa glæpa sé mun meira en það sem kært er til lögreglu.

Trúverðugir og bjóða góð verð

„Svindlararnir koma upp fölskum vefsíðum þar sem þeir nýta nöfn raunverulegra norskra sjávarútvegsfyrirtækja og nöfn stjórnenda og starfsmanna. Vefsíðurnar líta trúverðugar út,“ segir Marthe G. Birkeland, deildarstjóri efnahagsbrotadeildar hjá umdæmi lögreglunnar í Vestur-Noregi.

Marthe G. Birkeland. Ljósmynd/Politiet

„Vandamálið með vefsíðurnar er að upplýsingarnar um það hvernig skal hafa samband eru rangar. Hefur maður samband mun maður hitta á mjög almennilega sölumenn sem bjóða mjög gott verð á sjávarafurðum,“ útskýrir Birkeland.

Það eru sérstaklega nöfn fyrirtækja á vesturströnd Noregs sem notuð eru í svindlinu. Lögreglan biður kaupendur um að fara varlega í samskiptum við seljendur, meðal annars með því að fylgja varúðarreglum svo sem að eiga samskipti í gegnum myndsamtal, varast greiðslur á reikninga utan Noregs, forðast vefsíður sem enda ekki með .no og hafa ekki norska útgáfu af vefsíðunni, auk þess er mikilvægt að kanna hvort norska númerið sé að finna í norsku símaskránni.

Geta glatað þúsundum evra

Dæmi eru um að svikahrappar hafa náð að næla sér í þúsundir evra í stökum viðskiptum og tapaði til að mynda breska félagið Quay Meats 36 þúsund evrum, jafnvirði 5,7 milljóna íslenskra króna, þegar fyrirtækið festi kaup á makríl og lax sem átti að senda til Gana í Afríku.

Fram kemur í umfjöllun iLaks um þetta tiltekna mál að það hafi verið stimpill á upprunavottun afurðanna sem hafi vakið athygli Christopher Haworths, eigenda Quay Meats, en vörurnar voru vottaðar fyrir „Lýðveldið Noreg“, en Noregur er eins og þekkt er ekki lýðveldi heldur konungsríki. Auk þess þótti honum nöfn þeirra sem kvittuðu undir pappírana ekki hljóma norsk, Ngø Edmonds Rivælle og Dean Padmashreze.

Birta lista

Norska lögreglan fullyrðir að neðangreindar síður eru meðal þeirra sem svindlararnir nota:

• www.espevaerlaks.com
• www.viemkcofisk.com
• www.inkanorge.com
• www.sunseaseafood.com
• www.hansonfishingas.com
• www.fjoksak.com
• www.torsvagbruket.com
• www.verager.pl
• www.alincoas.com
• www.langenesas.com
• www.diamondshipping.org
• www.norwegian-seafoodsupply.com
• www.aschumsseafoodab.com
• www.kjpedesen.com
• www.sjotrollhavbrukas.com

Uppfært 10. júlí kl: 11:40

Sæmkvæmt upplýsingum frá Héraðsaksóknara, sem fer með efnahagsbrotamál hér á landi, hafa ekki komið upp sambærileg mál er tengjast íslenskum fyrirtækjum.

• 1 blogg um fréttina

Bloggað um fréttina

• Jóhann Elíasson: HVAÐ MEÐ LAXELDIÐ Á ÍSANDI??????