Síldveiðin gengur vel

Beitir NK kom með tæplega 1.000 tonn af síld til vinnslu í fiskiðjuveri Síldarvinnslunnar í Neskaupstað um hádegi í gær.

„Það er mikla síld að sjá og yfirleitt gengur býsna vel að ná henni. Við fengum til dæmis 685 tonn í fyrsta holi veiðiferðarinnar og toguðum þá í einn og hálfan tíma,“ segir Tómas Kárason skipstjóri í samtali við Síldarvinnsluna.

Hann bætir við að fiskurinn sé farinn að þoka sér austur eða norðaustur, sem þýðir að lengra er að sækja hann. 

Jón Gunnar Sigurjónsson, yfirverkstjóri í fiskiðjuverinu í Neskaupstað, segir að vinnsla síldarinnar gangi vel. Síldin er bæði heilfryst og flökuð og flökin fryst bæði með roði og roðlaus.

• Blogga um frétt