„Fylltum skipið á einum og hálfum sólarhring“

Veiðin gekk vel hjá áhöfninni á Bergey VE sem kom til hafnar í Vestmannaeyjum í gærmorgun með fullfermi af vænum vertíðarþorski. Náðist í skammtinn á aðeins einum og hálfum sólarhring, að því er segir á vef Síldarvinnslunnar. 

„Við byrjuðum á Péturseynni og enduðum á Vík. Það var hvöss landátt en þarna gátum við verið í dálitlu skjóli. Það gekk afar vel að fiska og við fylltum skipið á einum og hálfum sólarhring. Þarna fékkst stór þorskur – vertíðarfiskur. Þetta var mest 7-12 kílóa fiskur,“ segir Jón Valgeirsson skipstjóri. 

„Nú spáir hann haugabrælu næstu daga og því gerum við ekki ráð fyrir að halda til veiða á ný fyrr en á fimmtudag. Menn munu nota tímann fram að því til að dytta að skipinu,“ segir Jón. 

• Blogga um frétt