Verja hús og tanka vegna sprengihættu

„Við erum að einbeita okkur að því að verja tvö hús og tanka sem eru hér. Það er sprengihætta því það eru olíu-, gas- og súrefnistankar við bygginguna. Við munum ekki fara inn í húsið því þar er bæði eiturefna og sprengihætta,“ segir Davíð Rúnar Gunnarsson, slökkviliðsstjóri á Patreksfirði. Slökkvistarf er nú í gangi vegna eldsvoða í nýbyggingu Arctic fish á Tálknafirði. 

Davíð segir að húsið sé mjög illa farið.  „Við erum komin með tök á eldinum með tilliti til þess og höfum tök á því að verja allt sem þarf að verja.“

Hann gerir ráð fyrir því að slökkviliðið muni berjast við eldinn fram eftir degi. 

Frétt af mbl.is

Eldur laus á Tálknafirði

Unnið er að því að slökkva eldinn. Ljósmynd/Aðsend

Fólk náði að forða sér 

Eldurinn er í kerhúsi hjá fiskeldisfyrirtækinu Arctic fish sem var í byggingu. Ætlunin var að taka það í notkun í júní, að sögn Daníels Jakobssonar viðskiptaþróunarstjóra Arctic fish.

Hann segir að fólk hafi verið að störfum í húsinu þegar eldur kom upp. Allir hafi þó náð að forða sér frá tjóni. Í tilkynningu frá lögreglu segir þó að tveir hafi verið fluttir á slysadeild með minniháttar meiðsl. 

Daníel gerir ráð fyrir því að húsið sé ónýtt þar sem þakið er fallið niður. 

„Miðað við þær upplýsingar sem ég hef fengið er þakið farið að falla saman og mikið tjón," segir Daníel.

Byggingin er um 5.000 fermetrar að stærð og átti að verða þriðja seiðeldisstöðin á svæðinu.

Uppfært:

Frétt af mbl.is

Gætu þurft að rífa glænýtt kerhús

Daníel kveðst telja húsið ónýtt. Ljósmynd/Aðsend

• Blogga um frétt