Alræmdur hvalveiðaandstæðingur mætir á Íslandsmið á morgun
Setja bókamerki
Paul Watson, stofnandi umhverfisverndarsamtakanna Sea Shepherd, hefur boðað komu sína og áhafnar sinnar á skipinu John Paul DeJoria á Íslandsmið á morgun. Er ætlun Watson að hindra hvalveiðar. Þetta tilkynnir hann í bréfi sem hann sendi öllum alþingismönnum í maí.
Sökkti tveimur skipum árið 1986
Íslendingar þekkja Watson vel enda hefur hann áður skipulagt aðgerðir gegn hvalveiðum á Íslandi ásamt sjálfboðaliðum á vegum umhverfisverndarsamtakanna Sea Shepherd. Árið 1986 sökktu útsendarar á vegum samtakanna til að mynda tveimur hvalveiðibátum í Reykjavíkurhöfn með því að opna botnlokur þeirra. Einnig brutust þeir inn í Hvalstöðina í Hvalfirði og unnu skemmdir á tækjum og búnaði þar. Sea Shepherd lýsti ábyrgðinni á hendur sér.
Árið 2019 kom Watson síðan aftur til landsins í þeim tilgangi að stöðva hrefnuveiðar. Ekki stóð hins vegar til að fara á hrefnuveiðar það árið og hafði hann því ekki erindi sem erfiði.
Nú hefur Watson boðað komu sína á Íslandsmið á ný í þeim tilgangi að hindra hvalveiðar Hvals hf. Sendi hann öllum alþingismönnum bréf þess efnis 18. maí.
Ekki barátta gegn íslenskri þjóð
Í bréfinu segist Watson munu mæta á íslenskt hafsvæði ásamt áhöfn sinni um borð í skipinu John Paul DeJoria þriðjudaginn 20. júní, það er á morgun. Um borð í skipinu sé 32 manna áhöfn af 12 þjóðernum.
Þá leggur Watson áherslu á það í bréfi sínu að barátta sín snúi að einum manni, Kristjáni Loftssyni forstjóra Hvals hf., frekar en íslenskum stjórnvöldum eða íslenskri þjóð. Einnig heitir hann því að veita skipsverjum á hvalveiðiskipum ekki áverka.
Í bréfinu segir. „Markmið með komu okkar á íslenskt hafsvæði er að standa gegn ólöglegum fyrirætlunum Kristjáns Loftssonar og fyrirtækis hans, Hvals hf., um að drepa allt að 169 langreyðar í útrýmingarhættu. (...) Það sem við getum lofað, í samræmi við óflekkaðan feril okkar aðgerða án ofbeldis, er að skip mitt og áhöfn, muni ekki valda neinum meiðslum á skipverjum hvalveiðiskipa."
Vill að alþingismenn afturkalli leyfi Hvals hf.
Fer Watson einnig fram á það í bréfi sínu til alþingismanna að þeir afturkalli leyfi og heimildir Kristjáns í ár og til frambúðar.
Bréfið er undirritað af Paul Watson, Stofnanda Stofnunar Paul Watson skipstjóra. Virðast aðgerðirnar því að þessu sinni ekki vera undir flaggi Sea Shepherd heldur Stofnunar Pauls Watsonar.
Hvernig er vitað að þessi kona átti þetta barn?
Rampur númer 1.100 vígður í dag
„Þetta þarf að fara að gerast“
Kíghósti á töluverðri dreifingu í samfélaginu
„Gleymum því ekki að okkar vali fylgir ábyrgð“
Fylgi Höllu hrundi eftir kappræðurnar
Eldgosinu er lokið
