„Hafa aldrei upplifað aðra eins kolmunnaveiði“

„Menn hafa aldrei upplifað aðra eins kolmunnaveiði og að undanförnu,“ segir í færslu á vef Síldarvinnslunnar og hafa íslensku uppsjávarskipin hafa landað meira en 238 þúsund tonnum af kolmunna en útistandandi eru 71 þúsund tonn, samkvæmt skráningu Fiskistofu.

Beitir NK, uppsjávarskip Síldarvinnslunnar, er nú á landleið með 3.100 tonn af kolmunna úr færeysku lögsögunni og verður það síðasti kolmunnaafli útgerðarinnar í bili. Á útgerðin enn um 18 þúsund tonn óveidd en stefnt er að því að nýta heimildirnar í íslenskri lögsögu.

Í færslunni á vef Síldarvinnslunnar segir að veiðin hafi gengið mjög vel. „Veiðin hefur gjarnan verið um 100 tonn á togtíma á hinu svonefnda Gráa svæði syðst í færeysku lögsögunni. Skipin hafa kappkostað að koma með aflann vel kældan að landi og hefur hann reynst vera úrvalshráefni til vinnslu hjá fiskimjölsverksmiðjum Síldarvinnslunnar í Neskaupstað og á Seyðisfirði. Frá því eftir páska hefur veiðin verið samfelld og það sama er að segja um verksmiðjurnar, þær hafa sinnt framleiðslunni án hlés. Auk Síldarvinnsluskipanna, Barða, Beitis og Barkar, hafa Vilhelm Þorsteinsson EA og Hákon EA landað kolmunnaafla sínum hjá Síldarvinnslunni.“

Frétt af mbl.is

„Ég hef aldrei áður upplifað slíka veiði“

Þá segir að verksmiðjur fyrirtækisins í Neskaupstað og á Seyðisfirði hafa samanlagt tekið við 120 þúsund tonnum af kolmunna frá áramótum. Þar af 68 þúsund tonn í Neskaupstað og 52 þúsund tonn á Seyðisfirði.

„Starfsmenn fiskimjölsverksmiðjunnar í Neskaupstað bíða spenntir eftir að Beitir komi með lokafarm kolmunnaveiðitímabilsins að landi en við vinnslu á honum á að taka í notkun nýjan þurrkara í verksmiðjunni. Þurrkarinn kemur frá Vélsmiðjunni Héðni og er stærsti þurrkarinn af nýrri gerð sem Héðinn framleiðir,“ segir í færslunni.

Hefst nú undirbúningur makrílvertíðar hjá Síldarvinnslunni og er ekki ólíklegt að haldið verði til veiða seint í júní.

Fram kom á málstofu Hafrannsóknastofnunar á dögunum að ekki megi gera ráð fyrir að makríllinn gangi í miklu magni inn í íslenska lögsögu í sumar.

Frétt af mbl.is

Ekki líkur á miklum makríl í lögsögunni í sumar

• Blogga um frétt