Guðmundur Gíslason segir upp forstjórastöðu
Guðmundur Gíslason hefur óskað eftir því við stjórn Ice Fish Farm að láta af störfum sem æðsti stjórnandi fiskeldisfyrirtækisins sem starfrækt er á Austfjörðum. Hann mun í framhaldinu taka að sér nýtt hlutverk innan samstærðunnar og vinna að skipulagningu sölu afurða.
Þetta kemur fram í tilkynningu til norsku kauphallarinnar.
Guðmundur hefur verið í leiðtogahlutverki hjá fyrirtækinu um langt skeið og gegndi stöðu stjórnarformanns Fiskeldis Austfjarða ehf. áður en það sameinaðist Löxum ehf. undir merkjum Ice Fish Farm, en stærstu hluthafar sameinaðs félags eru norska eignarhaldsfélagið Måsøval Eiendom og Ísfélag hf.
„Það hefur verið ótrúlegt ferðalag með frábærum samstarfsmönnum að vera forstjóri Ice Fish á tíma mikils vaxtar og uppbyggingu nýrrar og sjálfbærrar atvinnugreinar á Íslandi undanfarin 12 ár. Ég hlakka mikið til að halda áfram að starfa fyrir og styðja félagið í framtíðinni með því að halda áfram að þróa markaði fyrir Ice Fish Farm,“ er haft eftir Guðmundi í tilkynningunni.
„Guðmundur hefur verið sannur frumkvöðull og leiðtogi Ice Fish frá árinu 2012 á tímabili þar sem fyrirtækið hefur farið frá því að vera á hugmyndastigi yfir í að verða lykilaðili í nýjum sjálfbærum íslenskum iðnaði. Ég er mjög þakklátur fyrir það sem hann hefur lagt af mörkum og hlakka til áframhaldandi samstarfs okkar á komandi árum,“ segir Asle Rønning, stjórnarformaður Ice Fish Farm.
Stjórn félagsins hefur þegar hafið störf við að finna arftaka Guðmundar og er áætlað að leitin muni taka nokkra mánuði, en Guðmundur mun gegna starfi forstjóra þar til nýr forstjóri tekur við.
