Tíu umsagnir um nýja lagareldisstefnu til ársins 2040 í samráðsgátt stjórnvalda snúast eingöngu um friðun Eyjafjarðar frá sjókvíaeldi, að því er fram kemur í Morgunblaðinu í dag.

Segir í umsögn sem Erlendur Steinar Friðriksson skrifar fyrir hönd Fiskirannsókna ehf. að félagið sinni rannsóknum á ferskvatnsfiskum og hafi rannsakað og fylgst með bágri stöðu sjóbleikjustofna í Eyjafirði. Auk þess hafi félagið staðið fyrir rannsóknum á urriðastofnum í Eyjafirði sem hafi vaxið nokkuð. Er fullyrt að sjókvíaeldi geti haft neikvæð áhrif á urriðastofnana og gert út um sjóbleikjustofnana.

„Til varna stofnum bleikju og urriða er því farið fram á að allt sjókvíaeldi verði bannað í Eyjafirði,“ segir í umsögninni.

Þá skilar einnig smábátafélagið Klettur umsögn þar sem félagið sem kveðst leggjast „alfarið gegn hugmyndum um sjókvíaeldi á fiski í Eyjafirði“. Þá segir: „…í Eyjafirði eru fengsæl fiskimið smábáta sem eru í hættu ef áframeldiskvíar í sjó verða leyfðar. Þá eru margar vinsælar veiðiár á svæðinu sem eru í hættu ef til slysasleppinga kemur líkt og oft hefur gerst.“

Frétt af mbl.is

Telja fengsæl fiskimið í Eyjafirði í húfi

Ásta Fönn Flosadóttir skrifar umsögn fyrir hönd æðarbænda í Eyjafirði sem óttast neikvæð áhrif sjókvíaeldis á lífríki fjarðarins. „Það er óskiljanlegt að Eyjafjörður sé ekki friðaður gegn fiskeldi í sjó. Þessi ófögnuður á ekkert erindi hér.“

Einnig hafa þrjú hvalaskoðunarfélög við Eyjafjörð skilað umsögn gegn sjókvíaeldi í firðinum sem og rekstraraðilar Hótel Natur Akureyri.

Fjallað er um umsagnirnar í Morgunblaðinu í dag.

Tengdar fréttir

Fiskeldi

Stöðvun gildistöku leyfis Arctic Fish hafnað

• Frumvarpið ekki til þess fallið að auka tekjur ríkissjóðs
• „Þetta er metnaðarfullt frumvarp“
• Beint: Lagareldisfrumvarpið kynnt
• Heldur kynningarfund um eldisfrumvarp

» Fleiri tengdar fréttir