Síldarvinnslan með mesta kolmunnakvótann

Lokið hefur verið við úthlutun 305.961 tonna kolmunnakvóta ársins 2024 og hlaut Síldarvinnslan langmesta aflaheimild í tegundinni, alls 91.536 tonn sem er rétt tæp 30% kolmunnakvótans.

Á eftir Síldarvinnslunni fylgir Brim með 64 þúsund tonn og svo Eskja með 58,7 þúsund tonn. Þessi þrjú félög fara saman með ríflega 214 þúsund tonn eða 70% kolmunnakvótans en alls hafa níu sjávarútvegsfyrirtæki kolmunnakvóta.

Svandís Svavarsdóttir matvælaráðherra undirritaði 21. desember breytingu á reglugerð um veiðar í atvinnuskyni þar sem tilgreint var að leyfilegur heildarafli í kolmunna árið 2024 yrði 323.084 tonn í samræmi við ráðgjöf Alþjóðahafrannsóknaráðsins (ICES). Þar af var 5,3% eða 17.123 tonnum ráðstafað atvinnu- og byggðakvóta í samræmi við lög og afgangurinn falinn Fiskistofu að úthluta í samræmi við kvótaeign sjávarútvegsfyrirtækja.

Á miðvikudag tilkynnti Fiskistofa að úthlutun veiðiheimildanna í kolmunna væri lokið.

• Blogga um frétt