Forseti bæjarstjórnar Ölfuss segir að það sé tilfinningalega átakanlegt að missa Ísfélagið úr Þorlákshöfn. Fyrr á árinu misstu níu manns vinnuna hjá fiskvinnslunni og á miðvikudaginn fengu þeir 26 starfsmenn sem eftir voru að vita að uppsögn væri í vændum.

„Okkur finnst þetta frekar sorglegt að fyrirtæki af þessari gerð sé að hverfa úr samfélaginu. Þetta er eitt af stærstu fiskvinnslu- og útgerðarfyrirtækjum í Þorlákshöfn,“ segir Gestur Þór Kristjánsson, forseti bæjarstjórnar Ölfuss, í samtali við mbl.is.

Frétt af mbl.is

Öllu starfsfólki fiskvinnslunnar sagt upp

Vonar að fólk fái vinnu í Þorlákshöfn

Flestir starfsmennirnir sem eru að missa vinnuna eru búsettir í Þorlákshöfn.

„Vonandi fá þau vinnu hér áfram. Ég veit að þeir [Ísfélagið] hafa sjálfir verið að reyna hjálpa fólki við að fá vinnu annars staðar,“ segir Gestur.

Er vinnu að fá í Ölfusi?

„Já það er í raun ekkert atvinnuleysi þannig vonandi fær þetta fólk vinnu hérna áfram. Fólk sem er búið að vinna hérna lengi og skjóta hér rótum.“

Gestur Þór Kristjánsson, forseti bæjarstjórnar Ölfuss. Ljósmynd/Aðsend

Hryggjarstykkið í vinnslunni horfið

Bæjarstjórn Ölfuss fékk formlega að vita af áformum Ísfélagsins á fimmtudag en degi á undan hafði félagið tilkynnt starfsmönnum sínum að uppsagnir væru í vændum í næstu viku.

Stefán Friðriks­son, for­stjóri Ísfé­lags­ins, sagði í samtali við mbl.is í morgun að eftir að humarveiðum var hætt árið 2021 hafi hryggjarstykkið í vinnslunni horfið.

Ísfé­lagið rek­ur frysti­hús og fiski­mjöls­verk­smiðju í Vest­manna­eyj­um og á Þórshöfn, frysti­hús í Þor­láks­höfn og rækju­verk­smiðju á Sigluf­irði. Stefán sagði að vinnsl­urn­ar í Vest­manna­eyj­um og á Þórshöfn anni því hrá­efni sem Ísfé­lagið hef­ur yfir að ráða.

Gestur nefnir að Þorlákshöfn sé upphaflega byggð upp í kringum útgerð og fiskvinnslu og því sé tilfinningalega átakanlegt að horfa á eftir fyrirtækinu fara úr bænum.

Tengdar fréttir

Ísfélag hf

Heimaey seld Norðmönnum

• Hafa fest kaup á skosku uppsjávarskipi
• Ísfélagið í stórræðum á Þórshöfn
• Fjárfesta í pökkunarlausn frá Marel
• Bókfæra mikinn hagnað eftir skráningu

» Fleiri tengdar fréttir

• Blogga um frétt