Auðveldar greiningu á Salmonellu

Mælingar á salmonellu og listeriu með PCR-aðferð styttir greiningartíma fyrir salmonellu úr 4 sólarhringjum niður í 1 sólarhring og fyrir listeríu úr 6 sólarhringum niður í 2 sólarhringa. 

Þetta kemur fram í tilkynningu frá Matís. 

Nýtt HPLC tæki í Neskaupstað

Með nýju aðferðinni er hægt að vinna sýni hraðar og greina og með tilkomu nýs HPLC tækis á starfstöð Matís í Neskaupsstað verður unnt að mæla rótamín í fiskimjöli sem gefur vísan á gæði mjöls. 

„Matís í Neskaupstað hóf nýverið mælingar á Salmonellu og Listeriu monocytogenis með PCR aðferð. Unnið hefur verið að því síðastliðna mánuði að bjóða upp á nýjar, hraðvirkar aðferðir við örverumælingar í matvælum og fóðri með notkun PCR tækni auk rótamín mælinga í mjöli. „Við erum ánægð að greina frá því að tilkoma þessarar tækni stóreykur þá þjónustu sem við getum veitt viðskiptavinum okkar,“ er haft eftir Stefáni Eysteinssyni, stöðvarstjóra í tilkynningu. 

Matís í Neskaupstað hyggst bjóða fólki til að kynna sér starfsemina kl. 16 á morgun, miðvikudag, og er hægt að skrá sig til þátttöku á heimasíðu Matís.

• Blogga um frétt