„Þetta reyndist vera fínasta hráefni,“

„Þetta reyndist vera fínasta hráefni,“ segir Geir Sigurpáll Hlöðversson, rekstrarstjóri fiskiðjuvers Síldarvinnslunnar í Neskaupstað, um barentshafsloðnu sem hefur fengist til vinnslu.

Í færslu á vef útgerðarinnar er bent á að tvö norsk loðnuskip komu til Neskaupstaðar í mánuðinum með meira en tvö þúsund tonn af loðnu sem veidd var í Barentshafi. Annað skipið landaði 750 tonnum en hitt um 1.300 tonnum.

Frétt af mbl.is

Kaupa norska loðnu á uppboði

„Aflinn er vel kældur um borð í skipunum og því er hráefnið gott þrátt fyrir langa siglingu til Íslands. Barentshafsloðnan er hins vegar mun smærri en loðnan sem veiðist hér við land,“ segir Geir Sigurpáll í færslunni.

„Það gekk vel að flokka loðnuna. Flokkarnir voru annars vegar hængur, 35-45 stykki í kílóinu, og hins vegar hrygna. Hrygnan fer til Asíu en hængurinn til Austur-Evrópu. Hængurinn er þegar seldur og verið að skipa honum út. Hrognafyllingin í seinni farminum sem kom til okkar var 16-17%, en nú eru skipin að melda 19-21% hrognafyllingu. Yfirleitt er hætt að frysta þegar hrognafyllingin er komin í 22% og þá er farið að huga að hrognaframleiðslu. Það verður varla framleitt mikið af hrognum núna enda nóg til frá síðustu vertíð.”

Barentshafsloðnan er heldur smærri en loðnan sem veiðist hér við land. Ljósmynd/Síldarvinnslan: Geir Sigurpáll Hlöðversson

• Blogga um frétt