Faðir áttburanna fundinn?

Fyrrverandi kærasti Nadyu Suleman, sem í janúar eignaðist áttbura í Los Angeles, segist geta verið faðir áttburanna og sex systkina þeirra.

Denis Beaudoin segir að hann hafi þrisvar gefið Suleman sæði sitt og hefur hann nú krafist DNA prófs. Hann segist þó ætla að hjálpa Suleman að ala upp börnin sama hver niðurstaðan úr prófinu verður, samþykki hún það. „Það er nógu erfitt að ala upp tvö börn, hvað þá 14,“ sagði hann. Suleman neitar því að Beaudoin sé faðirinn en hefur þó heimilað DNA prófið. Að sögn Beaudoin hafði Suleman beðið hann um að gefa sér sæði þar sem hún væri með krabbamein í eggjastokkum og gæti ekki eignast börn.

Hann viðurkennir að hafa talið bónina heldur undarlega en samþykkt þar sem honum þótti vænt um hana. Beaudoin sagðist hafa verið undrandi þegar frétti af því að Suleman hefði eignast áttburana í lok janúar og sagði jafnframt að hann tryði ekki fullyrðinum hennar um að hann væri ekki faðirinn. „Það hreinlega virðist sem margar fullyrðingar hennar hafi ekki reynst sannar,“ sagði hann.

• 1 blogg um fréttina

Bloggað um fréttina

• Jakob Falur Kristinsson: Áttburar