Þrátt fyrir ungan aldur er Reynar Hlynsson einn harðasti aðdáandi suðurafrísku rappsveitarinnar Die Antwoord á landinu. Hann segist hafa beðið lengi eftir tónleikum sveitarinnar en hún treður upp klukkan ellefu í kvöld á Secret Solstice-tónlistarhátíðinni í Laugardalnum.

Eftirvæntingin leyndi sér ekki þegar blaðamaður mbl.is ræddi við Reynar, sem er aðeins tíu ára gamall, fyrr í kvöld. Hann sagðist vera mjög spenntur fyrir tónleikunum og vonast helst til þess að sveitin spili lögin Ugly Boy og Cookie Thumper.

Reynar dró hann pabba og mömmu með á hátíðina til þess að hann gæti séð uppáhaldshljómsveitina sína með berum augum. Foreldrarnir sættu sig við það, enda gátu þau séð Radiohead spila í leiðinni. Þau fóru samt aðallega á hátíðina til þess að hann gæti séð Die Antwoord.

Aðspurður hvað heilli hann svona við Die Antwoord svarar Reynar: „Þetta er rosagóð hljómsveit og mér finnst hún bara, já, geggjuð. Ég veit það ekki.“

Hann segist fyrst hafa fengið áhuga á hljómsveitinni þegar hann sá kvikmyndina Chappie, sem hljómsveitin lék einmitt í, í fyrra.

Aðspurður hvort hljómsveitin njóti einnig vinsælda meðal jafnaldra hans eða vina neitar hann því staðfestlega. Hann sé aðeins einn í þessu.

Tengdar fréttir

Secret Solstice

Íslenskur hrekkjalómur vekur heimsathygli

• Hæstiréttur tekur fyrir mál Secret Solstice
• Sýknaðir af kröfum umboðsskrifstofu Slayer
• Ekkert fannst í þrotabúi Secret solstice-félags
• Secret Solstice ekki haldin á Vífilsstaðatúni

» Fleiri tengdar fréttir

• Blogga um frétt