Margir lýstu því yfir í aðdraganda forsetakosninganna í Bandaríkjunum að þeir hygðust flytja af landi brott ef Donald Trump næði kjöri.
Eins og fram kemur í frétt Mirror var fjöldi stórstjarna þeirra á meðal, líkt og Miley Cyrus, Amy Schumer, Samuel L. Jackson, Lena Dunham og söngkonan Cher.
„Fjandinn hafi það, ég ætla að flytja ef þetta verður forsetinn minn. Ég segi ekki hluti sem ég meina ekki,“ skrifaði Miley Cyrus á Instagram fyrr á árinu.
Amy Schumer renndi hýru auga til Evrópu, en hún sagðist ekki geta þolað að Trump yrði forseti.
„Sýningarnar mínar munu breytast. Ég mun þurfa að læra spænsku þar sem ég mun flytja til Spánar. Það væri ofar mínum skilningi ef Trump næði kjöri. Það er bara of klikkað,“ sagði Schumer í viðtali í sumar.
Leikarinn Samuel L. Jackson greindi frá því á síðasta ári að hann myndi flytja „sinn svarta rass til Suður-Afríku“ ef Trump næði kjöri.
„Ég veit að margir hafa verið að hóta þessu, en ég mun láta verða að því. Ég veit um indælan stað í Vancouver þar sem ég get sinnt vinnu minni,“ lýsti leikkonan og leikstjórinn Lena Dunham yfir fyrr á árinu, og er væntanlega farin að pakka niður í töskur.
Cher þykir Kanada ekki vera nægilega langt í burtu, en hún lýsti því yfir að hún myndi yfirgefa jörðina ef Trump yrði kjörinn forseti og flýja til Júpíter.
Svo er bara að bíða og sjá hvort stjörnurnar muni standa við stóru orðin.