Söngvarinn Leonard Cohen er látinn, 82 ára að aldri. Þetta kemur fram á opinberri Facebook-síðu söngvarans.
„Með mikilli sorg tilkynnum við að hið goðsagnakennda skáld, lagasmiðurinn og listamaðurinn Leonard Cohen, hefur fallið frá. Við höfum misst einn virtasta og afkastamesta hugsjónamann tónlistarheimsins,“ segir í færslunni.
Í framhaldi kemur fram að haldin verður athöfn til minningar um Cohen í Los Angeles þegar fram líða stundir. Þá biður fjölskyldan um næði til að syrgja.
Síðasta og 14. plata söngvarans kom út fyrir aðeins mánuði, en hún ber nafnið You Want It Darker.
Á meðal þekktustu laga eftir Cohen má nefna Suzanne, I'm Your Man og Hallelujah, en það lag hafa fjölmargir listamenn flutt síðan hann söng það fyrst árið 1984, á plötunni Various Positions.