Endurgerði lag fyrir gítarleikara Rammstein

Íslenski tónlistarmaðurinn Seint eða Joseph Cosmo eins og hann heitir réttu nafni fékk þann heiður að vinna lag á nýja smáskífu Richard Z. Kruspe, gítarleikara Rammstein. Joseph segir verkefnið hafa verið bæði stressandi og spennandi enda lengi haldið upp á tónlistarmennina í þýsku þungarokkshljómsveitinni. 

Joseph segir nýju smáskífuna sem ber nafnið Emigrate innihalda fimm endurgerðir af lagi Kruspe, War. Útgáfan með endurgerðunum kemur í kjölfar þess að Kruspe gaf út tónlistarmyndband við lagið sjálft á Youtube. 

„Ég fékk símtal einn dag fyrir rúmum mánuði síðan og voru það góðir vinir mínir Gunnar og Benni úr harðkjarnasveitinni Une misere. Þeir ljáðu mér þau tíðindi að upptökustjóra þeirra, Sky, vantaði færan aðila til að endurgera lag fyrir engan annan en Richard Z. Kruspe úr Rammstein. Strákarnir höfðu leyft Sky að heyra remix sem ég gerði fyrir Une misere árið 2017 sem honum líkaði mjög vel,“ sagði Joseph um það hvernig það kom til að hann vann lag fyrir gítarleikara Rammstein. 

„Þetta var bæði afar spennandi en í leiðinni mjög stressandi verkefni því tíminn var naumur sem ég fékk þannig að ég gekk strax í málið. Nokkrum dögum síðar var remixið tilbúið fyrir Richard að heyra og gaf hann strax grænt ljós á útgáfu. Ég vissi auðvitað ekki hvernig hann tæki því þar sem ég setti smá Seint verse í mixið. En það hefur greinilega fallið í kramið hjá honum,“ segir Joseph. 

„Rammstein voru idolin mín þegar ég sá þá í Höllinni 13 ára og um svipað leyti var ég sjálfur að byrja að spila í  þungarokksbandi. Ég var með stjörnur í augunum þegar ég barði þessa menn augum og gaman nú 17 árum síðar að fá að vinna fyrir einn þeirra,“ segir Joseph að lokum.

Joseph hefur unnið undir listamannsnafninu Seint síðan árið 2014. Nýlega gaf hann út plötuna IV sem finna á má á Spotify. Hægt er að hlusta á útgáfu Josephs eða Seint af laginu War hér á Spotify. Upprunalegt lag Richard Z. Kruspe og myndband má sjá hér að neðan. 

• Blogga um frétt