Tvíhöfði á Aldrei fór ég suður

Þeir Jón Gnarr og Sigurjón Kjartansson sem skipa Tvíhöfða munu koma fram á kvöldskemmtun á skírdag á Aldrei fór ég suður hátíðinni á Ísafirði. Að auki bættust meðal annars þau Auður, Bríet, Between Mountains og Ásta við hliðardagskrá hátíðarinnar. Þetta kom fram í opnun upplýsingamiðstöðvar hátíðarinnar þar sem greint var frá hliðardagskrárviðburði hátíðarinnar.

Áður hafði verið tilkynnt að Todmobile, Jónas Sig, Berndsen, Svala Björgvins, Mammút og Teitur Magnússon myndu koma koma. 

Frétt af mbl.is

Svala, Mammút og Teitur Magnússon á Aldrei fór ég suður

Í tilkynningu frá hátíðinni kemur fram að síðast hafi tvímenningarnir komið fram fyrir 15 árum síðan en þeirra fyrsta eiginlega uppistand átti sér einmitt stað á Ísafirði. Það var á skólaskemmtun í Menntaskólanum á Ísafirði árið 1995 og var það núverandi rokkstjóri Aldrei fór ég suður sem bókaði Tvíhöfða þangað á sínum tíma.

„Það var mjög eftirminnileg kvöldstund, ekki eiginlegt uppistand, ekki endilega leiksýning, ekki tónleikar en kannski einmitt allt í senn. Það sem var ógleymanlegt var að ég fékk símtal frá þeim viku fyrr, þar sem þeir settu fram kröfur um svokallaðan ræder. Á þeim lista var rjómi, pakki af smokkum, smámynt, límband og rifsberjahlaup,“ segir Kristján Freyr Halldórsson rokkstjóri Aldrei fór ég suður.

• Blogga um frétt