Á 65 mínútum varð uppselt á sýningu Tvíhöfða sem fer fram í kvöld í Ísafjarðarbíói, segir Kristján Freyr Halldórsson, rokkstjóri hátíðarinnar Aldrei fór ég suður, í samtali við mbl.is. „Það verður bara ein sýning, því miður, því síminn stoppar ekki,“ segir hann.
Kristján útskýrir að aðeins séu 250 sæti í boði og tekur fram að honum finnist mjög leiðinlegt að vísa fólki frá. „Við settum fyrr í dag á Facebook í hástöfum að það væri uppselt, en síminn hættir ekki að hringja og ég er hræddur um að það verði eitthvað um fólk í kvöld sem mun standa í röð hérna fyrir utan.“
Tvíeykið Tvíhöfði, Jón Gnarr og Sigurjón Kjartansson, komu síðast fram fyrir um 15 árum, en fyrsta alvöru sýning þeirra var einmitt á Ísafirði árið 1995. Þá hafði Kristján bókað þá á skólaskemmtun Menntaskólans á Ísafirði.