Kvikmyndin Hvítur, hvítur dagur eftir Hlyn Pálmason var valin besta mynd kvikmyndahátíðarinnar í Motovun í Króatíu á laugardagskvöld. Myndin hlaut mikið lof og það var einróma ákvörðun dómnefndar að velja hana bestu mynd hátíðarinnar.
Ingvar E. Sigurðsson sem leikur eitt aðalhlutverka í myndinni tók við verðlaununum í Króatíu fyrir hönd þeirra sem komu að gerð hennar, að því er segir í tilkynningu.
Ingvar hefur hlotið mikið lof fyrir frammistöðu sína og fékk bæði Louis Roederer Rising Star verðlaunin á Critics‘ Week, einni af hliðardagskrám Cannes-kvikmyndahátíðarinnar og einnig leikaraverðlaunin á Alþjóðlegu Transilvaníu-kvikmyndahátíðinni í Rúmeníu.
Myndin fjallar um lögreglustjóra sem hefur verið í starfsleyfi frá því að eiginkona hans lést óvænt af slysförum. Í sorginni einbeitir hann sér að því að byggja hús fyrir dóttur sína og afastelpu, þar til athygli hans beinist að manni sem hann grunar að hafi átt í ástarsambandi við konu sína. Fljótlega breytist grunur Ingimundar í þráhyggju og leiðir hann til róttækra gjörða sem óhjákvæmilega bitnar einnig á þeim sem standa honum næst.
Hvítur, hvítur dagur verður frumsýnd hér á landi 6. september.