Grínistinn Steve Harvey tilkynnti um rangan sigurvegara í búningakeppni fegurðarsamkeppninnar Miss Universe í Bandaríkjunum í gær. Þetta er í annað skiptið á 5 árum sem Harvey verður á í messunni og tilkynnir rangan sigurvegara.
Harvey tilkynnti að ungfrú Filippseyjar hafi unnið titilinn en ungfrú Malasía var raunverulegur sigurvegari. Þær leiðréttu hann á sviðinu.Í þetta skiptið var þó ekki jafn mikið undir, heldur aðeins verðlaun fyrir besta búninginn en ekki aðaltitillinn eins og árið 2015.
Hann kennir textaskjánum um ruglinginn en á skjánum stóð skýrt að Filippseyjar hefðu unnið. Það væri því ekki hægt að kenna honum um þetta. Hann fussaði svo: „Þið verðið að hætta að gera mér þetta.“
Eins og frægt er tilkynnti Harvey að ungfrú Kólumbía hlyti titilinn árið 2015 í stað fegurðardrottningarinnar frá Filippseyjum.