Leikkonan Naya Rivera var lögð til hinstu hvílu í Forest Lawn Memorial-kirkjugarðinum í Los Angeles 24. júlí síðastliðinn, tveimur vikum eftir að hún drukknaði í Piru-vatni.
Rivera var hvað þekktust fyrir hlutverk sitt í sjónvarpsþáttunum Glee þar sem hún fór með hlutverk klappstýrunnar Santönu Lopez.
Hinn 9. júlí leigði Rivera bát á Piru-vatni í Ventura-sýslu ásamt fjögurra ára syni sínum. Um kvöldið fannst báturinn á reki og sonurinn sofandi í bátnum. Leikkonuna var hvergi að finna. Hennar var leitað í fimm daga og að lokum fannst hún látin í vatninu. Réttarmeinarfræðingur staðfesti tveimur dögum seinna að hún hefði drukknað. Hún var 33 ára gömul.