Harry Potter-stjörnurnar Emma Watson og Tom Felton eru sögð hafa verið meira en bara vinir á einhverjum tímapunkti, að minnsta kosti voru tilfinningarnar eldheitar. Felton var spurður út í rómantískt samband þeirra á dögunum en gaf þó ekki of mikið upp.
„Við erum eitthvað,“ sagði Felton í viðtali á vef ET. „Við höfum verið mjög náin lengi. Ég dýrka hana. Mér finnst hún frábær. Vonandi fæ ég líka hrós frá henni.“
Felton vildi þó ekki beint segja að þau Watson ættu í ástarsambandi og virðist samband þeirra í dag vera bara vinasamband. „Hvað rómantísku hliðina varðar þá hugsa ég um þetta eins og Slytherin/Gryffindor frekar en Tom-og-Emmu-eitthvað. Mér finnst mikið til hennar koma,“ sagði Felton. Hann sagðist hafa talað við Watson aðeins nokkrum dögum fyrir viðtalið. Samtal þeirra snerist um ósköp hversdagslega hluti á borð við eldhúsvaskinn og hundamat.
Felton lék hinn illgjarna Draco Malfoy en Watson hina gáfuðu Hermione Granger. Leikarinn segist vera í góðu sambandi við mótleikara sína úr myndunum.