Björgvin Karl Guðmundsson, Katrín Tanja Davíðsdóttir, Annie Mist Þórisdóttir og Þuríður Erla Helgadóttir stíga aftur úr á keppnisgólfið á heimsleikunum í crossfit í dag. Er þetta annar keppnisdagur á leikunum sem hófust á miðvikudag.
Eftir fyrsta keppnisdag er Björgvin Karl í 4. sæti í karlaflokki, Katrín Tanja í 6. sæti í kvennaflokki, Annie í 12. sæti og Þuríður Erla í 19. sæti. Keppendur hafa lokið fjórum þrautum hingað til og eru ellefu eftir.
Brent Fikowski leiðir karlaflokkinn og Tia-Clair Toomey í kvennaflokki.
Karlar verða ræstir út klukkan 16:00 að íslenskum tíma í fimmtu þraut og þurfa að ljúka fjórum hringjum af þremur æfingum. Fyrst þarf að klifra fjórum sinnum upp í kaðal, svo ljúka 500 (konur 400) hitaeiningum á hjóli og svo að ganga með sandpoka ákveðna vegalengd. Konurnar verða ræstar út klukkan 16:45.
Karlar byrja á sjöttu þraut klukkan 18:40 og konur 19:16. Ekki er búið að gefa út hvað keppendur þurfa að takast á við þar.
Sjöunda þraut hefst klukkan 19:52 í karlaflokki og 20:32 í kvennaflokki. Ekki er búið að gefa út hvað keppendur þurfa að takast á við þar.
Áttunda þraut hefst klukkan 21:30 í karlaflokki og 22:00 í kvennaflokki. Þar þurfa keppendur að ganga ákveðna vegalend á höndum.
Síðasta þraut kvöldsins er ræst út klukkan 23:36 í karlaflokki og sex mínútur yfir miðnætti í kvennaflokki. Ekki er búið að gefa út hver þrautin er.
Mbl.is sýnir beint frá leikunum hér fyrir neðan.