Kvikmyndin The Northman var frumsýnd í London nú í kvöld. Íslenski rithöfundurinn Sjón skrifaði handrit myndarinnar ásamt leikstjóranum, Robert Eggers.
Sjón og Eggers voru báðir viðstaddir frumsýninguna ásamt stjörnum myndarinnar, stórleikurunum Önju Taylor-Joy og Alexander Skarsgård.
Willem Dafoe, Nicole Kidman og Ethan Hawke fara einnig með aðalhlutverk í myndinni ásamt Íslendingum á borð við Björk Guðmundsdóttur, Ingvar E. Sigurðsson og Hafþór Júlíus Björnsson.
Segir í tilkynningu að The Northman sé epísk stórmynd sem segir frá því hversu langt víkingaprins einn er tilbúinn að ganga til að ná fram hefndum fyrir morðið á föður sínum.
Myndin verður frumsýnd í kvikmyndahúsum á Íslandi 14. apríl.