Samskiptin geta ekki orðið verri

Rússnesk yfirvöld hafa lýst því yfir að samskipti þeirra og yfirvalda Bandaríkjanna geta ekki orðið verri en þau hafa verið hingað til, eftir að upplýst var að Mike Pompeo yrði nýr utanríkisráðherra Bandaríkjanna.

Þegar talsmaður Vladimirs Pútíns, Dmitry Peskov, var spurður um ráðherraskipti Bandaríkjanna  sagði hann „samskipti ríkjanna geta ekki orðið verri en þau hafa verið hingað til. Það er ávallt von um uppbyggilega nálgun gagnvart tvíhliða samskiptum okkar.“

Frétt af mbl.is

Trump tekur til

Í kveðjuræðu sinni sagði Rex Tillerson, fráfarandi utanríkisráðherra Bandaríkjanna, að yfirvöld í Washington þurfa gera meira til þess að svara „varhugaverðri hegðun og aðgerðum“ Rússa. Þá hafa verið uppi áhyggjur af framferði Rússa í sambandi við forsetakosningarnar vestanhafs árið 2016 og hafa Bandaríkin sakað Rússland um að hafa bein afskipti af þeim. Meðal annars hefur Kreml verið sakað um að hafa stolið upplýsingum frá Demókrataflokknum og dreift falsfréttum á samfélagsmiðlum.

Pompeo var fram að breytingum í ríkisstjórn Bandaríkjanna yfirmaður CIA, en í því embætti hefur hann meðal annars sagt CIA hafa tekið eftir aðgerðum sem miða að því að hafa áhrif á þingkosningarnar í nóvember.

• Blogga um frétt