Kvikmyndaframleiðandinn Harvey Weinstein lýsti yfir sakleysi sínu fyrir dómara í morgun en hann var formlega ákærður fyrir nauðgun og önnur kynferðisbrot í lok maí.
Lögmaður Weinstein hefur áður lýst því yfir að skjólstæðingur hans sé saklaus og harðneiti ásökunum sem fram komi í ákærunni.
Weinstein er laus gegn tryggingu og samþykkti að ganga með staðsetningarbúnað og afhenda vegabréfið sitt. Weinstein á yfir höfði sér 25 ára fangelsisvist, verði hann fundinn sekur.
Tæpir átta mánuðir eru síðan konur stigu fram og sökuðu Weinstein um kynferðislega áreitni og margvíslegt kynferðislegt ofbeldi. Ásakanir á hendur honum mörkuðu upphaf herferðarinnar #MeToo sem hefur haft gríðarleg áhrif um allan heim.
Weinstein er ákærður fyrir að hafa nauðgað konu á árinu 2013 og fyrir kynferðislegt ofbeldi gagnvart annarri konu árið 2004. Hvorug þeirra hefur verið nafngreind.
Að sögn lögmanns Weinstein snýst nauðgunarákæran um konu sem Weinstein hafi átt í tíu ára ástarsambandi við.