350 látnir í Indónesíu

347 hið minnsta létust í jarðskjálftanum sem reið yfir eyjuna Lombok á Indónesíu á sunnudag, að því er fram kemur á ríkismiðlinum Antara. Meirihluti þeirra látnu var í bænum Kayangan á norðurhluta eyjarinnar. Tæplega 1.500 manns slösuðust og um 165.000 hafa nú misst heimili sín vegna skjálftans sem mældist 6,9 stig.

Frétt af mbl.is

Öflugur jarðskjálfti á Lombok

Um 200.000 manns búa í norðurhluta Lombok, sem er fjalllent svæði en um 80% bygginga á svæðinu hafa nú hrunið. Flest dauðsföllin hafa orðið vegna húsþaka og veggja sem hafa hrunið.

Leitað í húsarústum á eyjunni Lombok. AFP

„Við höfum áhyggjur af að sjúkrabílar komist ekki leiðar sinnar vegna rústanna og skriðufalla,“ sagði Husni Husni, talsmaður Rauða krossins, í samtali við CNN. „Margir eru á vergangi og hafa flúið til fjalla af ótta við flóðbylgju.“

Frétt af mbl.is

Eyðileggingin víða algjör

Gusti Lanang Wisnuwandana, einn björgunarmanna, segir í viðtali við ríkismiðilinn að læknar og björgunarteymi eigi í vandræðum með sjúklinga sem eru dauðhræddir við að vera innandyra. „Þau eru enn í áfalli og vilja flest ekki vera innandyra þegar við framkvæmum aðgerð. Þau vilja að við hlúum að þeim utandyra,“ segir hann og bætir við að leit standi enn yfir.

• Blogga um frétt