Hægriöfgamaðurinn og fyrrverandi herforinginn Jair Bolsonaro er sigurvegari forsetakosninganna í Brasilíu. Þegar 88% atkvæða hafa verið talin er Bolsonaro með 55,7% atkvæða sem tryggir honum sigur. Hann mun taka við embætti um áramótin.
Fyrri umferð kosninganna fór fram fyrir þremur vikum. Þar fékk Bolsonaro 46% atkvæða. Á eftir honum kom Fernando Haddad, frambjóðandi Verkamannaflokksins, með 29%. Því var kosið á milli þeirra tveggja í annarri umferð kosninganna en upphaflega voru þrettán í framboði til forseta.
Bolsonaro tekur við forsetaembætti í stærsta ríki Suður-Ameríku og 8. stærsta efnahagskerfi heims. Völdin eru því mikil og ljóst að breytinga er að vænta í Brasilíu. Bolsonaro hefur verið lýst sem „brasilíska Trump“ og hefur hann tjáð umdeildar skoðanir á kynjajafnrétti, samkynhneigðum, innflytjendum og fátækum. Hann hefur verið þingmaður frá því 1991 og hefur bakgrunn í herþjónustu.
Góður árangur hans er eignaður öflugri herferð á samfélagsmiðlum, meðal annars í gegnum Facebook og WhatsApp.