Bréfið sem fannst inni á heimili Anne-Elisabeth og Tom Hagen eftir að henni var rænt getur skipt sköpum í rannsókn málsins segja sérfræðingar sem norska ríkissjónvarpið hefur leitað til. Þar er að finna hótanir, leiðbeiningar og kröfu um greiðslu lausnarfjár.
Telja sérfræðingar að í bréfinu megi lesa faldar vísbendingar um hverjir standi á bak við ránið á Anne-Elisabeth og hvaðan þeir eru.
Per Angel, sem er sérfræðingur í tæknimálum í sakamálarannsóknum og fyrrverandi yfirmaður tæknimála hjá norsku rannsóknarlögreglunni Kripos, segir að allt þetta sé til rannsóknar hjá Kripos.
Sérfræðingar benda á að bara pappírsgerðin geti gefið vísbendingar um hvaðan mannræningjarnir eru.
Rithandarsérfræðingurinn Reidun Wilhelmsen, sem hefur starfað með Kripos og er með víðtæka reynslu á þessu sviði, segir að fyrsta aðgerð sé að rannsaka pappírinn í smásjá. Síðan eru blöðin rannsökuð ítarlega, svo sem þykkt og eins hvort um einhver merki um skrift eftir penna eða blýant sé að finna – sem hefur afritast þegar pappírsörkin hefur legið undir öðrum pappír sem skrifað hefur verið á. Eins er fingrafara leitað.
Anne-Elisabeth Falkevik Hagen hvarf af heimili sínu í Lørenskog 31. október og var fyrst greint frá því opinberlega í síðustu viku. Engar vísbendingar hafa komið fram um hvar hana er að finna.