Upplifir martröð kvenna í El Salvador

Dómstóll í El Salvador hefur tekið til meðferðar á ný mál konu sem dæmd var til 30 ára fangelsisvistar fyrir manndráp eftir að hún fæddi  barn inni á salerni, sem hún segir hafa fæðst andvana. Saksóknarar fullyrða hins vegar að um þungunarrof hafi verið að ræða, en þungunarrofslöggjöf er óvíða harðari en í El Salvador. BBC greinir frá.

Konan, Evelyn Beatríz Hernández Cruz, hafði setið af sér tæplega þrjú ár af 30 ára dómi þegar hún var látin laus úr fangelsi í febrúar á þessu ári eftir að áfrýjunardómstóll úrskurðaði að réttað skyldi í málinu á ný. Hernández Cruz fékk þá leyfi til að dvelja heima hjá sér þar til dómur fellur aftur.

Frétt af mbl.is

Þrjátíu ár fyrir þungunarrof

Saksóknarar segja Hernández Cruz seka þar sem hún hafi ekki sætt heilbrigðiseftirliti á meðgöngunni. Sjálf segist hún hins vegar ekki hafa vitað að hún væri ólétt. Sérfræðingar gátu hins vegar ekki staðfest hvort fóstrið hefði dáið í móðurkviði, eða hvort það hefði dáið skömmu eftir fæðingu.

„Evelyn er að upplifa martröð margra kvenna í El Salvador,“ sagði lögfræðingur hennar Elizabeth Deras í samtali við AP-fréttaveituna.

„Þökk sé Guði, þá hef ég það fínt. Ég er saklaus og legg traust mitt á Guð og lögfræðinga mína,“ sagði Hernández Cruz er Efe-fréttaveitan náði tali af henni fyrir utan dómssalinn.

Tugir stuðningsmanna hennar höfðu safnast saman fyrir utan dómshúsið í höfuðborginni San Salvador og kölluðu eftir lagabreytingu, en þetta er fyrsta þungunarrofsmálið sem réttað er í á ný í El Salvador.

Frétt af mbl.is

Fæddi barn eftir nauðgun og er í fangelsi

Þungunarrof er bannað með lögum í landinu, hverjar sem kringumstæðurnar eru og hafa tugir kvenna verið fangelsaðir í málum þar sem konurnar sjálfar hafa fullyrt að um fósturlát eða andvana fæðingu hafi verið að ræða.

Hernández Cruz fæddi barnið á heimili sínu, sem er í dreifbýlli sveit, í apríl 2016. Hún missti meðvitund  og mikið blóð við fæðinguna. BBC hefur eftir móður hennar að læknar hafi enn verið að hlúa að henni á sjúkrahúsinu þegar lögregla var mætt á svæðið.

Við upphaflegu réttarhöldin sagði Hernández Cruz að sér hefði verið nauðgað ítrekað og sagði lögfræðingur hennar hana hafa verið hrædda við að kæra nauðgunina, en nokkrir fjölmiðlar í El Salvador segja nauðgarann tilheyra glæpagengi.

Hernández Cruz fullyrðir engu að síður að hefði hún vitað að hún væri ólétt hefði hún farið í læknisskoðun. Hún hafi hins vegar talið einkenni óléttunnar vera magaverki þar sem blætt hafi með reglulegu millibili og hún því talið sig vera á blæðingum. Dómarinn úrskurðaði engu að síður að henni hafi verið kunnugt um að hún væri ólétt.

Mannréttindasamtök í El Salvador segja hið minnsta 20 konur til viðbótar sitja í fangelsi vegna brota á þungunarrofslöggjöfinni, en undanfarinn áratug hefur mannréttindasamtökum tekist að fá um 30 konur leystar úr haldi með endurmati á sönnunargögnum og endurupptöku mála.

• Blogga um frétt