Óttast að raðmorðingi sé að verki
Setja bókamerki
Lögreglan í Bresku-Kólumbíu í Kanada rannsakar nú tvöfalt morð tveggja ferðalanga sem fundust skotnir til bana. Fórnarlömbin voru ungt par, Chynna Deese 24 ára gömul frá Bandaríkjunum og Lucas Fowler, 24 ára Ástrali.
Lík þeirra fundust á mánudag í síðustu viku og stuttu síðar fannst bíll þeirra yfirgefinn við þjóðveg nálægt vinsælum ferðamannastað, Liard Hot Springs. Vitni sáu til þeirra þar sem þau stóðu við bílinn rétt við þjóðveginn. Bíllinn virtist hafa bilað en parið var við góða heilsu og virtist hafa stjórn á aðstæðum.
Lögreglan hefur dreift skissu af manni sem sást tala við Lucas við þjóðveginn og biðlar til almennings að koma upplýsingum sem gætu nýst við rannsókn málsins á framfæri.
Faðir Lucasar, Stephen Fowler, er yfirlögregluþjónn í Nýju-Suður-Wales-lögreglunni í Ástralíu og ferðaðist til Kanada um leið og hann frétti af örlögum sonar síns. Hann segir að saga þeirra Chynna og Lucasar hafi verið „ástarsaga sem endaði með harmleik“.
Hann mun ekki taka þátt í rannsókninni en segist hafa mikla trú á þeim lögreglumönnum sem fara með rannsókn málsins til að leysa ráðgátuna. Unga kærustuparið hafði kynnst á farfuglaheimili í Króatíu árið 2017 og urðu þau samstundis ástfangin. Síðan þá höfðu þau verið dugleg að ferðast um heiminn saman.
Tveir unglingar týndir og brunnið lík
Lögreglan í Bresku-Kólumbíu rannsakar einnig hvarf tveggja unglinga, þeirra Kam McLeod sem er 19 ára og Bryer Schmegelsky sem er 18 ára. Húsbíll þeirra fannst brunninn til kaldra kola nálægt smábænum Dease Lake síðastliðinn föstudag.
Þeir voru báðir frá Port Alberni í Vancouver og höfðu verið á ferðalagi um Norður-Kanada. Fjölskyldur þeirra höfðu samband við lögregluyfirvöld eftir að ekkert heyrðist frá þeim í nokkra daga. Síðast sást til þeirra yfirgefa matvöruverslun í Dease Lake.
500 kílómetrar á milli
Dease Lake er um 500 kílómetra frá Liard Hot Springs þar sem lík Chynna Deese og Lucas Fowler fundust og rannsakar lögreglan nú hvort tengsl séu á milli morðanna á þeim og hvarfs unglinganna tveggja.
En ráðgátan varð töluvert flóknari þegar lögreglan fann brunnið lík stutt frá rústum húsbíls unglinganna. Ekki hafa verið borin kennsl á líkið en búið er að útiloka að það sé af týndu drengjunum. Lögreglan gaf út skissu af manninum sem fannst látinn og biður almenning um aðstoð við að bera kennsl á hann.
Tveir menn mögulega týndir
Þá er talið líklegt að tveir menn til viðbótar séu týndir eftir að bíll þeirra fannst yfirgefinn við Logan-vatn, suður af Kamloops í Bresku-Kólumbíu. Ekkert hefur heyrst frá mönnunum, sem heita Ryan Provencher og Richard Scurr, síðan 17. júlí og þykir það mjög ólíkt þeim. Þeir eru báðir á fertugsaldri.
Lögreglan hefur ekki gefið út hvenær bíll þeirra fannst eða hvort verið sé að kanna möguleikann á því að hvarf þeirra tengist morðunum á kærustuparinu, líkinu sem fannst brunnið eða hvarfi unglinganna tveggja. Það eru 1.400 kílómetrar milli Logan-vatns og Dease Lake þar sem unglingarnir sáust síðast.
Eru tengsl milli málanna?
Mjög óvanalegt er að svo margir finnist látnir eða séu týndir á þessum slóðum í Norður-Kanada og því hafa málin vakið athygli fjölmiðla um allan heim. Margir telja, bæði almenningur og fjölmiðlamenn, að atvikin séu öll tengd og að mögulega hafi raðmorðingi verið að verki.
Átta til tólf erlendir glæpahópar
Mikilvægt að úrræði séu endurskoðuð
Quang Le: „Ég gerði ekkert rangt“
Einróma stuðningur við virkjanir
Fjármögnun alríkisins enn í óvissu
„Hví erum við dýrasta land í heimi?“
Quang Le: „Rottuskíturinn kom mér á óvart“