Bandaríkjaher hefur hafið prófanir á meðallangdrægum eldflaugum, en ekki eru nema nokkrar vikur frá því að bandarísk stjórnvöld sögðu sig frá rúmlega 30 ára gömlu kjarnorkuvopnasamkomulagi við Rússland.
BBC greinir frá og hefur eftir Bandaríska varnarmálaráðuneytinu að tilraunin, er flaugum var skotið á haf út frá strönd Kaliforníu, hafi tekist vel.
INF samningurinn, sem var undirritaður af þeim Ronald Reagan þáverandi Bandaríkjaforseta og Sovétleiðtoganum Mikaíl Gorbatsjov árið 1987, lagði bann við framleiðslu á meðaldrægum eldflaugum.
Hafa rússnesk stjórnvöld sakað bandarísk stjórnvöld um að auka á spennu í hernaðarsamskiptum þjóðanna.
Fyrr á þessu ári sökuðu bandarísk stjórnvöld og NATO rússneska ráðamenn um að brjóta gegn banninu með dreifingu nýrrar gerðar eldflauga. Rússnesk stjórnvöld höfnuðu því alfarið.
Bandarísk stjórnvöld sögðust hins vegar sannanir fyrir því að Rússar hafi dreift fjölda eldflauga af gerðinni 9M729 og tilkynnti Donald Trump Bandaríkjaforseti í febrúar að Bandaríkin myndu segja sig frá samkomulaginu gengjust Rússar ekki undir samkomulagið á ný fyrir 2. ágúst, sem var svo gert.
Vladimír Pútín Rússlandsforseti sagði í kjölfarið Rússa frá kjarnorkuvopnasamkomulaginu og hafa ákvarðanir ríkjanna vakið áhyggjur af að nýtt vopnakapphlaup sé í uppsiglingu.