„Til hamingju vinir mínir,“ sagði Justin Trudeau forsætisráðherra við stuðningsmenn Frjálslynda flokksins á kosningavöku seint í gærkvöldi. Ljóst er eftir kosningar þar í landi í gær að Frjálslyndi flokkurinn mun mynda stjórn en nær ekki einn meirihluta.
Frjálslyndi flokkurinn hlaut 157 þingmenn á þinginu en Íhaldsflokkurinn, undir stjórn Andrew Scheer, hlaut 121 þingmann.
Samtals sitja 338 þingmenn á kanadíska þinginu og þarf því 170 þingmenn að lágmarki til þess að mynda meirihluta.
Fram kemur í frétt AFP að Trudeau muni því mynda stjórn með stuðningi eins eða fleiri flokka.
„Takk fyrir að hafa trú á okkur að beina landinu í rétta átt,“ sagði Trudeau enn fremur við stuðningsmenn sína.
Trudeau vann stórsigur fyrir fjórum árum þegar Frjálslyndi flokkurinn hlaut meirihluta á kanadíska þinginu. Hins vegar hefur stjórnartíð hans í seinni tíð þótt einkennast af ýmsum hneykslismálum.