Forsvarsmenn tæknifyrirtækisins Apple segjast ætla að skoða nánar hvernig fyrirtækið tekur á landamærum sem deilt er um í kortagrunni sínum.
Stjórnvöld í Úkraínu hafa gagnrýnt Apple fyrir að birta Krímskaga sem hluta af yfirráðasvæði Rússlands í Apple Maps og í veðurforriti fyrirtækisins.
Talskona Apple segir að fyrirtækið fari eftir innlendum og alþjóðlegum lögum og breytingin, sem á aðeins við um notendur í Rússlandi, hafi verið gerð í kjölfar nýrrar löggjafar sem var samþykkt í landinu, að því er segir á vef BBC.
Apple segir í yfirlýsingu, að fyrirtækið hafi ekki gert neinar breytingar í Apple Maps varðandi Krímskaga annar staðar en í Rússlandi.
Farið sé yfir alþjóðalög, viðeigandi löggjöf í Bandaríkjunum sem og önnur lög sem eiga við í hverju og einu ríki fyrir sig áður en tekin er ákvörðun um það hvernig eigi að merkja svæði í kortaforritinu. Breytingar séu gerðar ef þess gerist þörf lögum samkvæmt.