Bernhardt Esau, fyrrverandi sjávarútvegsráðherra og Sacky Shanghala, fyrrverandi dómsmálaráðherra í ríkisstjórn Namibíu, munu ekki taka sæti á þingi í kjölfar þingkosninga í landinu síðustu viku.
Þetta hefur namibíska dagblaðið Informanté eftir Hage Geingob, forseta Namibíu. Í ræðu sem forsetinn hélt í dag segist hann jafnframt hafa fjarlægt ráðherrana fyrrverandi af félagatali SWAPO-flokksins.
JUST IN: President Hage Geingob has announced that former justice minister, Sacky Shanghala & former fisheries minister, Bernard Esau, both currently in prison for curruption in the #Fishrot saga, will be withdrawn from the National Assembly & removed from the party list.
— Informanté (@InformanteNews) December 2, 2019
Geingob, sem er 78 ára, hefur gegnt forsetaembættinu í eitt kjörtímabil. Hann er flokksbundinn SWAPO en flokkurinn hefur verið við völd í Namibíu frá því að landið fékk sjálfstæði frá Suður-Afríku árið 1990. SWAPO hefur verið með tvo þriðju sæta á þingi landsins frá 1994.
Esau og Shanghala eru á meðal sexmenninga sem kærðir hafa verið fyrir spillingu og peningaþvætti í tengslum við Samherjaskjölin.
Í dag átti dómstóll í höfuðborginni Windhoek að taka fyrir kröfu sexmenninganna um að verða leystir úr haldi gegn tryggingu, en lögmenn þeirra féllu frá kröfunni, án útskýringa, og verða mennirnir því í varðhaldi til 20. febrúar.